Smija fàcil lòn che a l’é nen
prima ëd butesse a felo.
Ij problemi a sauto fòra sùbit dòp
avej comensà a proveje.
Për esempi: fé ‘l grop a la croata
a dovrìa esse na ròba facila,
calcolà che ògni matin
mila impiegà a sfilo për la sità
tuti tapà e përfumà , diret an ufissi
con dj bej e variegà grop al còl
(chi ëd seda, chi ëd lan-a,
chi mach sintética se a l’é andaje mal
e ‘d cariera a l’é nen riessù a fene).
A bon cont savejsse gropé la croata
decentement e sensa fé rìje gnun,
a l’é ‘l dover d’ògni òm rispetabil!
Da sòn tacoma la lession.
Për prima còsa na croata almen
venta bin avejla përchè dësnò…
e ëd man ne servo doe për esse ën grad.
Con la drita ten-e s-ciasa la part strèita
dla stòfa an question da traté;
con la snistra ambranché la larga
e dé doi gir dantorn a la strèita
lògicament! lassand na filura
al second an manera da podèj fé passé
la part larga. Peui fela giusta passé
e saré a piasì con la man snistra…
Disoma che dit parèj a smija fàcil
e magara a l’é për da bon na cretinada.
Ma atension a nen massese provendje…